LARACHA. A aula lúdica municipal, servizo gratuíto que o Concello oferta ás familias que teñen ao seu cargo nenos de entre 3 e 12 anos de idade, estreará mañá martes a nova programación tras poñerse punto e final ás actividades relacionadas co verán...

LARACHA. Ademais, a partir do xoves, día 9 de setembro, recuperará o horario de inverno, de luns a venres de 16.00 a 20.00 horas, adaptándose, deste xeito, ao inicio do curso escolar 2010-2011.

Como vén sendo habitual nos últimos anos, todos os venres, de 18.00 a 19.30 horas, o persoal especializado da aula lúdica desenvolverá unha sesión de contacontos dirixida a todos os públicos que se enmarcará dentro da segunda etapa do programa denominado “Pequenos, grandes lectores”. O propósito é fomentar a lectura entre os nenos máis pequenos por medio dunha actividade entretida, divertida e chamativa para os rapaces.

A relación de contacontos e datas é a seguinte:

- 7 de setembro: “El rey de casi todo”.
- 10 de setembro: “El país con el delante”.
- 17 de setembro: “O parruliño feo”.
- 24 de setembro: “O galo que rompeu o peteiro”.
- 1 de outubro: “O lobo e os sete cabritiños”.
- 8 de outubro: “Colasiño”.
- 15 de outubro: “O burro ladrón”.
- 22 de outubro: “O can futbolista”.
- 29 de outubro: “Os tres porquiños”.
- 5 de novembro: “O grilo trompeteiro”.
- 12 de novembro: “Catarina e Frederico”.
- 19 de novembro: “Os ladróns e os amigos do muiñeiro”.
- 26 de novembro: “Pechaollos e os soños”.
- 3 de decembro: “A vaca Catuxa”.
- 10 de decembro: “Ollobrusco”.
- 17 de decembro: “O pito Cairo”.
- 24 de decembro: “O pequeno Yared”.
- 31 de decembro: “El oso que amaba los libros”.

Paralelamente aos contacontos, levarase a cabo outra programación diferente ata final de ano a través da cal cada quincena estará dedicada a un tema a partir do que se realizarán diversas actividades relacionadas coa aprendizaxe e a concienciación sobre determinados valores e cuestións sociais e medioambientais, coas seguintes datas, títulos e actuacións a desenvolver:

- Do 13 ao 24 de setembro: “Palabras máxicas: grazas, perdón, por favor”. Por medio de representacións teatrais e xogos de palabras, tratarase de concienciar aos rapaces sobre a o emprego destas verbas e, nun concepto máis amplo, sobre a importancia da amabilidade na vida cotiá.

- Do 27 de setembro ao 8 de outubro: “Dúas boas coñecidas: puntualidade e cortesía”. Amosar a importancia destas valores é o principal obxectivo das actividades que se desenvolverán durante estas dúas semanas na aula lúdica.

- Do 11 ao 22 de outubro: “Non somos rexoubeiros”. O obxectivo é concienciar aos nenos sobre a importancia de respectar aos demais e aprenderlles pautas básicas de comportamento. O medio a través do que se pretende acadar é a realización de xogos e traballos manuais.

- Do 25 de outubro ao 5 de novembro: “Os reis da mesa”. A pretensión do persoal da aula lúdica nestas dúas semanas será inculcar aos nenos un correcto comportamento á hora de xantar, explicándolles a postura que deben ter e o emprego axeitado dos apeiros que se utilizan para ese fin,

- Do 8 ao 19 de novembro: “Adeus ás leoneiras”. A limpeza e o orden serán os valores obxecto de aprendizaxe durante esta quincena, que se realizarán por medio de xogos e lectura de contos relacionados co tema.

- Do 22 de novembro ao 3 de decembro: “Maquiniñas, ás veces”. Orientarase aos nenos no emprego das novas tecnoloxías e explicaráselles a importancia dun consumo correcto das mesmas.

- Do 6 ao 17 de decembro: “Aprendendo seguridade”. Por medio de simulacións na aula de diferentes situacións que se poden producir na realidade, os rapaces aprenderán a tratar con descoñecidos e a importancia de ser precavidos.

- Do 20 ao 31 de decembro: “Nenos exemplares”. O propósito nesta quincena será aprender pautas de comportamento nas distintas situacións que poidan presentarse para saber estar en cada lugar. Para iso realizaranse xogos teatrais e a aula será adaptada para as diferentes situacións que poidan presentarse.

Cabe lembrar que a aula lúdica municipal está situada no edificio de Servizos Múltiples da capital municipal. Está aberta de luns a venres, no inverno entre as 16.00 e as 20.00 horas e no verán de 10.00 a 14.00 horas, adaptándose deste xeito ás necesidades das familias en épocas de vacacións ou no periódico escolar.

A través deste servizo, totalmente gratuíto para os usuarios, ofrécese a posibilidade aos pais con ocupacións de deixar aos nenos o tempo que estimen conveniente (desde uns minutos por unha necesidade puntual ata as catro horas diarias nas que se ofrece o servizo), sen necesidade de reservar praza ou pedir cita previa, nun lugar onde estarán ben atendidos por dúas educadoras e en compañía doutros nenos da súa idade, participando nas actividades propostas ou tamén facendo os deberes da escola ou repasando cuestións relacionadas cos seus estudos.