Se convocan as subvencións a fondo perdido para a rehabilitación e renovación da calidade das vivendas no medio rural e conxuntos históricos de Galicia...

EXPOSICIÓN DE MOTIVOS:

No diario oficial de Galicia de data 19 de Xullo pasado, publicouse a resolución do 1 de Xullo do 2010 do Instituto Galego de Vivenda e Solo, polo que se convocan as subvencións a fondo perdido para a rehabilitación e renovación da calidade das vivendas no medio rural e conxuntos históricos de Galicia.

Ademais da existencia de vivenda rural no conxunto dos concellos galegos, Galicia dispon de mais de 85 Concellos con Cascos Historicos que se estaban a aproveitar desta subvención co obxeto de potenciar e poñer en valor o seu patrimonio historico-artistico e arquitectonico. Esta tarefa, por parte de moitos Concellos, se estaba a levar a cabo dende fai anos con unha clara vocación política de conservación do mellor do noso patrimonio e dende a coordinación institucional.

Cada ano, o Goberno galego tense involucrado cada vez mais, e as subvencións a rehabilitacións e renovacións de vivendas eran cada vez mais importantes, permitindo o mantemento dunha dinámica de arranxo das edificacións moi beneficiosa tanto para a cidadanía en xeral como para a creación de emprego no ámbito das empresas da construcción. Na anterior lexislatura deuse un salto cualitativo moi importante, froito tamén do compromiso coa rehabilitación impulsado dende o Goberno de España a través do Ministerio de Vivenda, e as axudas foron solicitadas por un número moi importante de persoas, redundando todo elo nun mantemento e nunha mellora dos nosos Cascos Históricos certamente notable.

Así, no ano 2009 a subvención por “cédula de rehabilitación de calidade” tiña unhas subvencións máximas que non podian superar o 50% do orzamento total da obra que eran os seguintes:

• Para rehabilitación ano 2009 maximo de 24.000 € a fondo perdido por vivenda, que podian ser compatibles con outras subvencións, por exemplo A.R.I. (Areas de Rehabilitación Integral)

• Para a renovación ano 2009 máximo de 30.000 € a fondo perdido por vivenda, que podia ser compatible con outras subvencións, A.R.I.

Este ano, dentro das medidas fronte a crise, o Goberno de España ten decidido que as obras de rehabilitación estén exentas de pagar o IVE, para impulsar a actividade económica dun sector moi afectado pola actual situación económica e para seguir permitindo que os cidadáns que máis o precisan conten con axudas para ter unha vivenda digna e en condicións de habitabilidade, seguridade e accesibilidade concordantes coas necesidades actuais.

Fronte a esta actitude, o Goberno galego, a través da Resolución do 1 de Xullo, reduce de maneira irracional estas subvencións pasando as obras de rehabilitación de 24.000€ subvencionables a 6.600 €, e as de renovación de 30.000 € do ano 2009 a 8.800 € neste ano. Como podemos comprobar reducironse un 72% as subvencións a fondo perdido para os particulares, o que vai a provocar innumerables consecuencias todas elas de gran calado:

• Afecta esta decisión a particulares que xa tiñan realizado a obra, - dada a tramitación dos proxectos, das cédulas e as axudas que se veñen realizando da mesma maneira dende fai 15 anos- reducíndose hasta en 20 mil euros as expectativas das axudas, coas consecuencias imaxinables.

• Esta decisión provoca un parón irremediable nunha dinámica de rehabilitación de máis dunha década, que servía ó tempo para mellorar os cascos das nosas vilas e cidades e para mellorar as condicións de vida de moita xente.

• Perxudícase de maneira notable a empresas pequenas dedicadas á rehabilitación e á construcción que precisaban neste momento de incentivos para a súa actividade económica e o mantemento do emprego

• Minóranse de maneira importante os ingresos dos concellos a través do ICIO, cando a financiación municipal está pasando un momento difícil

• Redúcense fondos para unha política estratéxica en materia de vivenda mentras a Consellería responsable triplica eses fondos no que dedica a publicidade.

Por todo o exposto, o PLENO do CONCELLO DE ARTEIXO aproba a seguinte

PROPOSTA DE RESOLUCIÓN:

• Instar á Xunta de Galicia a deixar sin efecto a Resolución publicada o 19 de xullo e modificar as cantidades dedicadas ós fondos de rehabilitación de vivendas nos Cascos Históricos e no ámbito rural.

• Instar á Xunta de Galicia a convertir a rehabilitación nun eixe prioritario para impulsar a actividade das empresas da construcción e permitir a mellora das condicións de vida dos galegos e das galegas.

• Levar adiante unha liña de axudas á rehabilitación que permitan o acceso a estes fondos por parte daqueles colectivos que teñen máis dificultades económicas e que viven en barrios ou áreas con edificacións máis deterioradas.

• Instar á Xunta de Galicia a informar ó conxunto da poboación das medidas impulsadas polo Goberno de España no que se refire ó impulso da rehabilitación e da eliminación do IVE destas obras.

• Consensuar coa Fegamp as liñas de acción e axudas para garantir o acceso á vivenda digna polo conxunto da sociedade galega.