As pernoitas tamén experimentaron un aumento do 8,7% respecto ás acadadas no ano 2009. O incremento tamén se viu mellorado respecto ao último Xacobeo 2004, cun 6,4% de aumento no caso dos viaxeiros e dun 6,6% no caso das pernoitas en establecementos de aloxamento regrado...

O número de viaxeiros aloxados nos establecementos regrados de Galicia durante o primeiro semestre do ano foi do 12,6% respecto ao mesmo período do ano 2009, segundo os datos oficiais do Instituto Nacional de Estadística (INE). As cifras das pernoitas tamén superaron os valores do ano pasado, nun 8,7% respectivamente. O incremento dos seis primeiros meses do ano viuse ademais mellorado respecto ao primeiro semestre do anterior Xacobeo 2004, cun 6,4% de aumento no caso dos viaxeiros e dun 6,6% no caso das pernoitas.

O incremento no volume de viaxeiros é unha característica común a todas as tipoloxías de aloxamento, sendo especialmente significativo nos hoteis e pensións da comunidade, xa que ambas rexistran unha suba do 13% respecto do primeiro semestre de 2009. Os apartamentos turísticos e os cámpings, que amosan subas menos dinámicas, superan levemente os valores do ano pasado, rexistrando en conxunto estas dúas modalidades unha suba media do 1,9%.

En canto ás pernoitas do primeiro semestre do ano, os hoteis rexistraron un incremento medio do 13,8% respecto ao ano 2009 e os establecementos de turismo rural unha suba do 3,9%.

Respecto do primeiro semestre de 2004 as cifras melloran tanto no nivel global como en cada unha das tipoloxías de aloxamento consideradas. No caso do conxunto da oferta hoteleira o incremento é do 5,4% de viaxeiros e do 6% no caso das pernoitas. Os cámpings experimentaron un incremento notable de viaxeiros respecto a 2004, cun aumento do 17%. No segmento do turismo rural as subas roldan entre o 10 e o 15% mentres que os apartamentos turísticos rexistran as porcentaxes máis elevadas.

Xuño
O número de viaxeiros aloxados nos establecementos regrados de Galicia no mes de xuño foi dun 18,4% máis respecto do mesmo período do ano pasado, un aspecto que tamén se reflectiu nas pernoitas, cun 13,5% máis de aumento.

As cifras do conxunto da oferta de establecementos regrados tamén manifestan unha mellora respecto do último Xacobeo 2004, pois o volume de viaxeiros incrementouse nun 5%, mentres que o de pernoitas subiu un 2,4%. Dentro das diferentes categorías, destacan os hoteis, cunha suba do 20,87% na cifra de viaxeiros e os establecementos de turismo rural, cun incremento do 21,01% de viaxeiros.