Con cargo á convocatoria da Consellería de Industria e Comercio. Tamén se pedirá a colaboración económica da Xunta de Galicia para cofinanciar a mellora do entorno do cruceiro de Lestón. A creación dunha web de contidos de promoción turística é outro dos proxectos do equipo de goberno...

A Xunta de Goberno Local do Concello da Laracha, reunida en sesión ordinaria hoxe luns, acordou solicitar unha subvención á Consellería de Industria e Comercio con cargo á convocatoria de axudas para a habilitación e mellora de infraestruturas dos parques empresariais de Galicia, que é cofinanciado polo Plan FEDER Galicia 2007-2013.

O Concello da Laracha pretende participar nesta convocatoria de subvencións co obxecto de obter parte do financiamento económico necesario para a execución do proxecto de pavimentación e mellora dos accesos ao parque empresarial desde a AC-552.

O proxecto está valorado nunha cantidade moi próxima aos 150.000 euros e contempla a ampliación da superficie da calzada e a nova pavimentación da estrada que parte da Braña Grande e discorre polos núcleos da Lagarteira e da Xesteira ata chegar ao ámbito do polígono industrial. En total, a actuación afectaría a 2.640 metros lineais desta vía.

Proxectos dinamizadores de áreas rurais
Así mesmo, a Xunta de Goberno autorizou ao goberno local solicitar a participación na convocatoria de axudas da Axencia Galega de Desenvolvemento Rural dirixida á realización de proxectos dinamizadores de áreas rurais, que se cofinanciará a través do fondo europeo agrícola de desenvolvemento rural FEADER no marco do PDR Galicia 2007-2013.

Neste caso, a actuación que presenta o Concello da Laracha consiste no acondicionamento do entorno do cruceiro situado no lugar das Rañeiras (parroquia de Lestón). A prioridade deste proxecto é protexer do tráfico rodado este elemento do patrimonio histórico municipal, e a obra que se propón consiste en crear unha zona verde e axardinada, equipada con mobiliario urbano e xogos infantís, xunto ao propio cruceiro. O tráfico cara a estrada AC-552 será desviado uns metros, contemplándose tamén a renovación do pavimento para facilitar o tránsito dos vehículos.

Así, ao mesmo tempo que se mellora a seguridade e a estética nesta zona, sería creado un novo punto de encontro para os veciños nas inmediacións do centro sociocultural das Rañeiras, situado precisamente xunto ao propio cruceiro.