O conselleiro de Medio Ambiente, Territorio e Infraestruturas, Agustín Hernández, anunciou onte pola mañá que a venda de parcelas do parque empresarial de Morás, en Arteixo, comezará a principios de 2012, non máis alá do primeiro trimestre. Así llo trasladou onte pola mañá o conselleiro ao alcalde de Arteixo, José Calvo Calvelo, co que mantivo un encontro de traballo para abordar as cuestións do departamento que dirixe relativas a este concello.

Tamén lle avanzou que o remate da obra está prevista para o último trimestre de 2012 e que na actualidade xa están finalizadas as tarefas de desbroce, o retranqueo do gasoduto e os movementos de terras. A día de hoxe estase a executar a instalación de servizos, que se atopan ao 65%.

Esta infraestrutura industrial contará con máis de 1.480.000 metros cadrados, dos que a súa maior parte, un millón de metros cadrados, destinaranse a superficie industrial e os restantes resérvanse para zonas verdes e de aparcamento. A Xunta inviste máis de 75 millóns de euros na execución deste proxecto.

Rotonda de Sabón
Outro dos temas abordados na reunión foi a construción da glorieta a dous niveis de Sabón. Hernández concretou que nestes momentos estase a traballar nos trámites para poder asinar un convenio de colaboración entre a Deputación Provincial, o Concello e a Consellería. Dito acordo asinarase no primeiro semestre deste ano para, posteriormente, licitar as obras.

O titular de Infraestruturas mantén os prazos para a execución desta infraestrutura a dous niveis, que conta cun investimento de máis de 10,6 millóns de euros.

O obxectivo desta obra consiste en solucionar á conxestión de vehículos nas estradas que dan acceso á zona industrial de Arteixo. Un dos cambios máis significativos desta infraestrutura de organización do tráfico é que pasa de tres a dous niveis.

Así, proxéctase a reordenación do tráfico mediante a execución dunha glorieta a nivel superior (sobre a actual) á que estarán conectadas as estradas AC-551, a DP-0394 e a AC-552 do lado de Vilarrodís (dirección A Coruña), mediante ramais de acceso. A glorieta elevada terá 28 metros de radio e estará encaixada dentro da zona axardinada da glorieta existente.

O proxecto tamén recolle o desdobramento da estada AC-551, que pasará a ter dous carrís por sentido. Ademais, co fin de reducir o tráfico dentro da glorieta actual, proxectaranse carrís de acceso directo para os vehículos que realicen o movemento desde a AC-551 cara á AC-552 (sentido á Coruña) e para os vehículos procedentes de Arteixo (AC-552) que desexen incorporarse á AC-551. Na imaxe pódese consultar o trazado.

Esta modificación, ademais das vantaxes de prazo, económicas e de menor afección, achega unha solución á saturación de tráfico, flexibilidade nos traxectos de orixe- destino, e evita unha afección de nivel freático na infraestrutura.

A nova glorieta permitirá soportar o gran volume de tráfico diario que entra e sae do polígono ou que provén das estradas A Coruña- Cee (AC-552), a estrada A Coruña- Sabón (AC-415) ou da vía que une o Polígono de Sabón coa e autoestrada A Coruña- Carballo (AC-551).